စစ်ကိုင်းတောင်
သူတော်စင်ပေါင်း ပျော်စံအောင်း
ဂူကျောင်းချောင်တွေ ပေါများပေ
စေတီပုထိုး အမျိုးမျိုး
ရိုကျိုးစိတ်တွင် ဖူးရောက်ချင်
စည်ပင်သည့်ချောင် စစ်ကိုင်းတောင်။
မြင်းကယဉ်လေး မြန်မြန်ပြေး
မနှေးပေမင့် နှေးသည်ထင့်
ချိန်လင့်မဆိုင်း တောင်စဉ်တိုင်း
ဒုန်းစိုင်းတက်ရောက် ပျော်ပုံမောက်
ဝမ်းမြောက် ဝမ်းသာ ရောက်တဲ့ခါ။
တောင်ပေါ်လမ်းလေး ပန်းဖွေးဖွေး
ငှက်ကျေးမြူးပျော် ဖို၊မ ဖေါ်
ရှုမျှော်လေတိုင်း မှုန်ရီမှိုင်း
စစ်ကိုင်းသေလာ ချောင်နေရာ
တစ်ခါရောက်ဖူး စိတ်ကြည်နူး။
တောင်တော်တစ်ဝှမ်း ကျောင်းသင်္ကန်း
ရေချမ်းကပ်လှူ သီတဂူ
ပြည်သူအားပေး ရေတွေဖွေး
ချမ်းအေးသာယာ စည်ပင်လာ
ဇေယျာတောင်တန်း စိမ်းရောင်လွှမ်း။
လူသံတိတ်ဆိတ် ချောင်တော်ရိပ်
ချွေးသိပ်ပန်းဖြေ ခိုနားနေ
မျှဝေ ရွှင်လန်း ရေကြည်ကမ်း
အားစွမ်း သစ်လွင် ခရီးနှင်
ဖူးမြင်ခဲ့ပေ စေတီတွေ
တွေ့မြင်ခဲ့ပေ ချောင်စဉ်တွေ
မွေ့ပျော်၍နေ သူတော်တွေ
ပေါများ၍နေ သီတဂူရေ ။ ။
ကိုရင်စစ် (စစ်ကိုင်း)
No comments:
Post a Comment